Tough guy club

Salins Hulbot

Togh goy. Wa dayun namo masabti ang gihisgutan sa among higala nga salida sa sine. Dihang misugod na siyag istorya diha na namo mahibaw-i nga ang Asian martial arts movie diay nga Tough Guy maoy buot niyang ipasabot.

Tingali kay napul-an na og statesmen/diplomat type ang mga tao mao nga tough guy/strongman na karon ang flavor of the elections. So out si Pierce Brosnan ug in si Charles Bronson.

Bag-o lang natong gipili ang strongman from Davao nga si Rodrigo “Digong” Duterte pagka presidente sa atong nasud. Hinuon wa man nato gipili ang himabaye ug himalikas nga mayor tungod lang sa iyang pagka isug. Ang gaunang rason nga gipili siya tungod sa maayo niyang pagda sa dakbayan sa Davao. Nanghinaut ang taga NCR nga kon unsa ka hapsay ang dagan sa kinabuhi sa Davao mao sab unya ang kahapsay sa ilang lugar kon mapresidente nas Digong. Thrilling.

Wa sad magpa uwahi ang USA ning tough guy club. Duna usab silay ilang version ni Duterte sa persona ni Donald Trump. Sama sa mga Pinoy gipul-an na ang mga Kano sa kandidato nga pahimutang kaayo moistorya. Mao nga dihang mibutho ang himalikas ug himabaye nga bilyonaryo ug reality TV host nagkaguliyang ang ilang politikanhong kinabuhi. Daghan ang mokuyog ug moabiba kang Trump tungod sa kay sa tanang kandidato sa Republican Party siya ra ang may household name. Ug gawas pa, ang iyang pagka bilyonaryo mihatag og mensahe nga malampuson siya sa iyang negosyo.

Ug karon, dinhi sa atong dakbayan, dunay buot mointra ning tough guy club, bahala nag gabitay iyang tiyan mo enter gyud siya.
Sa una ang iyang idol si Lee Kuan Yew, maong diha pa siyay gamay nga pagka statesman. Kay gadamgo lagi siya intawon nga mahimong Singapore ang Cebu.

Pero patay naman si Lee ug ang mas raw nga version naman sa tough guy ang uso, maong nag level up napud siya sa iyang image.

Wa pa gali siya maka lingkud pagbalik sa iyang karaang lingkuranan misibya na siyag ganti alang sa mga pulis nga makapatay og kriminal sa usa ka ingkwentro. Wa pa gyud siya matagbaw miingon napud siya nga ang mga civilian nga makapatay pud og kriminal makadawat sab og ganti.

Kulba ug kataw-anan kining exploration into the absurd ni Tomas Osmeña. Ang nakakulba niani kay kon itandi ang nawong sa atong mayor kang Digong ug Donald kuwang kini sa humor ug charisma.

Maong magduda kitag nanghambug ba lang siya o nayabag na kini og nga buot na kini nga makasaksi tag pinusilay kada adlaw. Abi ko man gud og ang iya rang bahin sa halin sa SRP maoy iyang gidaganag balik. Mo dalikyat paman sad diay og salida ang amaw. Lights! Camera! Wild, Wild Streets!